Տարվա «Լավագույն ուսանող» ամենամյա մրցանակաբաշխության մեկնարկը տրված է։ Սիրելի ուսանողներ դուք արդեն կարող եք ներկայացնել ձեր դիմումը և դառնալ քոլեջի տարվա լավագույն ուսանող մրցանակաբաշխության հաղթողը և ստանալ ձեր մրցանակը։

Մրցանակաբաշխությանը կարող են մասնակցել բոլոր այն ուսանողները, ովքեր առնվազն 2 կիսամյակ հանդիսացել են քոլեջի ուսանող, վերջին մեկ կիսամյակի ընթացքում ունեցել են բարձր կամ գերազանց առաջադիմություն, ինչպես նաև ունեն ստորև նշված ձեռքբերումները:

Մրցանակաբաշխությանը մասնակցելու (որպես թեկնածու առաջադրվելու) համար ուսանողը պետք է ներկայացնի համապատասխան հայտ և անհրաժեշտ կից փաստաթղթերը: Թեկնածուների առաջադրումն իրականացվում է համապատասխան հայտերի միջոցով` թղթային ձևաչափով (հայտի ձևը կարող եք վերցնել ուսումնական մասից), որը ներկայացվում է քոլեջի ուսումնական մաս: Հայտերի ներկայացման վերջնաժամկետը համարվում է հունիսի 21-ը ներառյալ։

«Վարդենիսի բժշկա-հումանիտար քոլեջի լավագույն ուսանող» մրցանակակիր որոշելու համար դիտարկվում են ուսանողի հետևյալ ձեռքբերումները՝

առաջադիմություն,

ներգրավվածություն հետազոտական(ինքնուրույն) աշխատանքներում,

մասնակցություն ներքոլեջային կյանքին,

քոլեջից դուրս ակտիվություն` մշակույթի, սպորտի, արվեստի և այլ ոլորտներում հաջողություններ:

Մրցանակաբաշխության մասնակիցներն հայտին կից կարող են ներկայացվել հետևյալ փաստաթղթերը.

պրոֆեսորադասախոսական կազմի ներկայացուցիչների բնութագիր (առավելագույնը երկու բնութագիր),

ուսանողական խորհրդի նախագահի բնութագիր,

տպագրված հետազոտական (ինքնուրույն) աշխատանքների հավաստող փաստաթղթեր (եթե այդպիսիք կան),

քոլեջից դուրս ակտիվությունը հավաստող փաստաթղթեր (եթե այդպիսիք կան),

այլ փաստաթղթեր և նյութեր, որոնք լավագույնս կներկայացնեն մրցանակաբաշխությանը մասնակից ուսանողի ձեռքբերումները:

Ներկայացված բնութագրերը և այլ փաստաթղթերը պետք է հստակ և հնարավորինս մանրամասն ներկայացնեն ուսանողի ձեռքբերումները: